पत्रकार – मेघना सुर्वे : त्यागमूर्ती माता रमाई आंबेडकर यांच्या १२८ व्या जयंतीनिमित्त स्वयंम् दीप विचार मंच तथा स्वयंम् दीप क्रिकेट संघ, पालपेणे यांच्या संयुक्त विद्यमाने आयोजित ‘त्यागमूर्ती माता रमाई आंबेडकर चषक २०२६’ स्पर्धेचा अंतिम सामना नुकताच धम्म दीप बुद्ध विहार, पालपेणे बौद्धवाडी येथे जय बजरंगी पालशेत व गुलजार गुहागर या संघांमध्ये पार पडला. या अंतिम सामन्यात जय बजरंगी पालशेत संघाने प्रथम फलंदाजी करत ३३ धावांचे उद्दिष्ट ठेवले होते. उद्दिष्टाचा पाठलाग करताना गुलजार गुहागर संघाला जय बजरंगी पालशेत संघाने अवघ्या २१ धावांवर रोखले आणि प्रथम क्रमांकाचा मानकरी होण्याचा मान मिळवला.
आयोजकांकडून संपूर्ण कार्यक्रमाचे अतिशय चांगल्या पद्धतीने नियोजन करण्यात आले होते. यावेळी पालपेणे गावचे सुपुत्र व सामाजिक कार्यकर्ते उमेश खैर आणि प्रविण संसारे यांची प्रमुख उपस्थिती लाभली. या दोन दिवसीय स्पर्धेसाठी पेवे गावचे बौद्धजन सहकारी संघ शाखा क्रमांक १३ मुंबई सचिव गितेश कदम आणि गुहागरचे निहाज यांनी आपल्या सुमधुर आवाजात समालोचन करत सामना प्रेक्षकांपर्यंत प्रभावीपणे पोहोचवला.
संपूर्ण स्पर्धेसाठी पंच म्हणून दिलीप गमरे, प्रज्ञेश कांबळे, सुशांत सावंत, विशाल गमरे, रुपेश काताळकर व ऋतिक गमरे यांनी जबाबदारी सांभाळली. या स्पर्धेत प्रथम पारितोषिक म्हणून इलेव्हन स्टार क्रिकेट संघाचा अष्टपैलू खेळाडू, निगुंडल गावचा सुपुत्र फैझान कापडी यांनी १५,००० रुपये रोख पारितोषिक दिले, तर द्वितीय पारितोषिक म्हणून १०,००० रुपये रोख रक्कम सुजित कदम (पेवे) यांच्याकडून विशेष देणगी स्वरूपात मिळाले. या संपूर्ण कार्यक्रमासाठी उमेश गमरे, यांचे मूल्यवान सहकार्य व स्वयंम् दीप विचार मंचचे सर्व सदस्य, बौद्धजन सहकारी संघ शाखा क्र. २२ तसेच माता रमाई महिला मंडळ यांचे विशेष सहकार्य लाभले.
