अंबरनाथ प्रतिनिधी : एअरटेल गॅलरी, डीमार्टमध्ये मराठी बोलण्यावरुन झालेल्या वादाची प्रकरणे ताजी आहेत. त्यात मनसेने संबंधितांना दणका दिला होता. आता बँक ऑफ महाराष्ट्रच्या अंबरनाथ शाखेतही असाच प्रकार समोर आला आहे. अंबरनाथच्या बँक ऑफ महाराष्ट्रमध्ये अमराठी ब्रँच मॅनेजरने मराठी बोलण्यास नकार देत उलट उत्तरं दिल्याची घटना समोर आली. त्यानंतर संतापलेल्या मनसे पदाधिकाऱ्यांनी बँकेत जाऊन गोंधळ घातला. यावेळी मराठीत बोलता येत नसेल, तर तुमच्या राज्यात निघून जाण्याचा इशारा या ब्रँच मॅनेजरला मनसेच्या पदाधिकाऱ्यांनी दिला.
रिझर्व्ह बँकेच्या नवीन गाईडलाईन्स प्रमाणे बँकेचे व्यवहार मराठीत करण्याच्या सूचना देण्यात आल्या आहेत. याबाबतचं पत्र मनसेकडून सर्व बँकांना देण्यासाठी बुधवारी अंबरनाथमध्ये शहराध्यक्ष कुणाल भोईर, शहर संघटक स्वप्निल बागुल आणि विद्यार्थी सेनेचे जिल्हाध्यक्ष धनंजय गुरव हे कार्यकर्त्यांसह गेले होते. यावेळी अंबरनाथच्या बँक ऑफ महाराष्ट्रमध्ये शर्मा नामक अमराठी ब्रँच मॅनेजरने मराठी येत नसल्याचं सांगितलं. त्यावर मनसेने मराठी येत नसल्यास तुमच्या राज्यात जाऊन काम करा, असा इशारा त्यांना दिला. त्यावर या ब्रँच मॅनेजरने हे आमच्या पुण्याच्या मुख्य शाखेला जाऊन सांगा, असं उत्तर दिलं. तेव्हा संतापलेल्या मनसे पदाधिकाऱ्यांनी ब्रँच मॅनेजरच्या केबिनमध्ये घुसून जाब विचारला. तसेच बँकेचे व्यवहार मराठीत न झाल्यास मनसे स्टाईलने आंदोलन करण्याचा इशारा दिला.
