पुणे प्रतिनिधी : सावकाराच्या जाचाला कंटाळून रिक्षा चालकाने आत्महत्या केल्याची धक्कादायक घटना पिंपरी चिंचवडमध्ये घडली. राजू नारायण राजभर असे आयुष्य संपवलेल्या तरुणाचे नाव असून आत्महत्येआधी त्याने व्हिडिओ रेकॉर्डिंग करत तसेच चिठ्ठी लिहीत चार जणांच्या त्रासाला कंटाळून मी जीवन संपवत असल्याचे म्हटले आहे. या घटनेने शहरात एकच खळबळ उडाली आहे.
याबाबत सविस्तर माहिती अशी की, मला मानसिक आणि आर्थिक त्रास देणाऱ्या बेकायदेशीर सावकाराच्या जाचाला कंटाळून मी आत्महत्या करण्याचा अत्यंत चुकीचा निर्णय घेत आहे, मला माफ करा. असं भावनिक आव्हान करत राजू नारायण राजभर या तरुणाने चिंचवड येथील साईनगर भागातील आपल्या राहत्या घरात गळफास घेत आत्महत्या केली आहे. रजनी सिंग, राजीव कुमार उर्फ गुड्डू भैया, महादेव फुले आणि हनुमंत गुंडे उर्फ अविनाश गुंडे या चार बेकायदेशीर सावकाराच्या जाचाला कंटाळून मी आत्महत्या करण्याचा अत्यंत चुकीचा निर्णय घेत आहे. असा व्हिडिओ तयार करत आणि सुसाईड नोट लिहत राजू राजभर या तरुणाने आपल्या राहत्या घरात गळफास घेत आत्महत्या केली आहे.
मला मारायच्या धमक्या येत होत्या, तुझ्या मुलांना उचलू, असे आरोपी म्हणत होते. मला घरातून किंवा बाहेरुन कोणताही सपोर्ट मिळाला नाही, त्यामुळेच मी हे टोकाचे पाऊल उचलत असल्याचे या रिक्षा चालकाने या व्हिडिओमध्ये म्हटले आहे. मी माझ्या बायकोची, माझ्या मुलीची क्षमा मागतो, असंही तो या व्हिडिओमध्ये म्हणतो. माझ्या छोट्या मुलीला सांभाळा, माझ्या अंत्यसंस्कारासाठी माझ्या पत्नीकडे पैसे नसल्याने मला इलेक्ट्रॉनिक भट्टीमध्ये जाळा असं अत्यंत भावनिक आव्हान देखील राजू राजभर या तरुणाने केला आहे. आता या प्रकरणात निगडी पोलिसांनी रजनी सिंग, राजीव कुमार, महादेव फुले आणि हनुमंत गुंडे या चार आरोपींविरोधात आत्महत्येस प्रवृत्त केल्याचा गुन्हा दाखल करण्यात आला आहे.
पोलिसांनी दिलेल्या माहितीनुसार, रिक्षाचालकाचा मुलगा गणेश राजु राजभर यांनी फिर्याद दिली आहे. फिर्यादी गणेश यांचे वडील राजू राजभर हे रिक्षा चालवत होते. त्यांनी आरोपींकडून हातउसने पैसे घेतले होते. ते पैसे परत करुन देखील त्यांचे शिल्लक असलेल्या व्याजाची रक्कम परत न केल्याच्या कारणावरून आरोपींनी घरात घुसून तुला मारुन टाकू, तुला कापून टाकू, अशा वारंवार धमक्या देत होते. या धमक्यांमुळं ते सतत तणावात होते. हा तणाव सहन न झाल्यानं त्यांनी शुक्रवारी दुपारी साडेबाराच्या सुमारास आत्महत्या केली. निगडी पोलीस ०३/२०२५ भारतीय न्याय संहिता कलम १०८, ३५२. ३(५) महाराष्ट्र सावकारी अधिनीयम कलम ३९ प्रमाणे अधिकचा तपास करत आहेत.
